Минатиот петок Бундестагот го одобри федералниот буџет за 2023 година, а според него околу 750.000 германски граѓани може да добијат 200 евра од државата за својот роденден, јавуваат германските медиуми.

Владата сака да ги поттикне младите да одат на културни настани. „Сакаме да го отвориме патот кон културата. Сакаме да ги заинтересираме младите за различноста на културата во нашата земја“, изјави министерката за култура Клаудија Рот од редовите на Зелените.

Тоа ќе биде таканаречена „културна пропусница“ на која ќе има 200 евра, а со тоа треба да се поддржи и културната индустрија која се уште се бори со последиците од пандемијата. Средствата се наменети за книги, посети на музеи и изложби, кина, концерти, театарски претстави и слично, но имплементацијата се уште не е сосема јасна.

Средствата би можеле да се искористат во текот на две години, а институциите кои нудат културни содржини ќе можат да се регистрираат преку веб-страницата, а ќе биде достапна и мобилна апликација.

Владата за пилот-проектот ќе одвои 100 милиони евра, а „пропусница“ би добиле сите граѓани кои ќе наполнат 18 години во 2023 година. Доколку проектот биде успешен, проектот би можел да се прошири на населението од 15 до 17 години.