Општина Центар додели 48 спортски стипендии, Герасимовски најави изградба на два нови затворени базени
Градоначалникот на Општина Центар, Горан Герасимовски денеска додели 48 спортски стипендии на најдобрите спортисти од основните училишта во општината од повеќе спортски дисциплини.
Препорачано
Стипендиите се доделуваат во три категории, во износ од 2.500, 3.000 и 3.500 денари, и се исплаќаат месечно во текот на осум месеци од учебната година, информираат од Општината.
Добитници се учениците што се истакнале како најдобри стрелци, играчи и голмани во општинската лига, како и оние кои постигнале исклучителни резултати во пливање, карате, гимнастика, тенис, џудо, скијање, триатлон, мечување и бадминтон.
Герасимовски, на доделувањето истакнал дека во периодот што следи ќе се изградат два нови затворени базени во основните училишта „11 Октомври“ и „Димитар Миладинов“, каде пливањето ќе биде дел од наставната програма по спорт.
„Во програмата за наредниот период предвидуваме изградба на два нови покриени базени, едниот токму во ова училиште, „11 Октомври“, а вториот во ООУ „Димитар Миладинов“. Учениците од Центар ќе имаат уникатна можност пливањето да стане дел од наставната програма“ изјави Герасимовски.
