Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес: печени тиквички.

– Во светот на брзото живеење, сè почесто ја бараме таа златна средина – оброци што се лесни за подготовка, а истовремено здрави и вкусни. Тиквичките, како еден од најблагодарните пролетни зеленчуци, го нудат токму тоа. Овој рецепт ќе ви покаже како со неколку едноставни состојки да подготвите јадење што изгледа и има вкус на вистинско домашно уживање – порачува Бобе.

Состојки:

– 2 тиквички
– 4 јајца
– 150 г брашно
– 2 млади кромитчиња
– 5 лажици пармезан рендан
– масло и сол по вкус

Подготовка:

1. Изматете ги јајцата и додајте ги ситно сечканите млади кромитчиња.
2. Тиквичките исечете ги на кругови (дебелина 0,5 см), посолете ги и оставете ги кратко да пуштат вода.
3. Извалкајте ги парчињата тиквичка во брашно и наредете ги во намастена тава.
4. Печете во загреана рерна на 220 степени Целзиусови околу 10 минути.
5. Извадете ја тавата, полевајте ги тиквичките со јајцата и кромитчињата, и одозгора наросете пармезан.
6. Вратете ги во рерна и печете дополнителни 10 минути, додека не добијат златна боја.

Совет: Послужете ги со чаша бело вино и лесна салата – идеален ручек или вечера за пролетен ден.

Едноставните состојки, кога ќе се спојат со малку љубов и внимание, можат да создадат вистинско кулинарско уживање.

На здравје!