Градоначалничката на Скопје Данела Арсовска со куп вработени во градот Скопје се појави пред Обвинителството за гонење организиран криминал, со два багери покрај информативна табла со назив на објектот „безбедна дивоградба“. Таа со недели алармира дека институциите не постапуваат по нејзините пријави за 150 дивоградби во Чаир за кои обвинува дека примарната цел е преку нив да се исперат пари.

Го повикувам Ислам Абази од Основното јавно обвинителство за организиран криминал и корупција, да ги оправда тие 2 проценти доверба кои ги има обвинителството кај граѓаните и да постапи по доказите за криминал. Во спротивно креира опасен преседан, ќе започнеме сите со капитални проекти за градење безбедни дивоградби и обезбедување гратис станови со џабе вода и џабе струја за оние на кои не им е решено станбеното прашање. И нема да смеат да ни писнат, ни да прашаат од кај се парите.Плус ќе треба да им се извинат на сите кои ги казниле, им срушиле објект или отслужуваат казна за бесправна градба, напиша Арсовска.