Модните изданија на Оскарите 2026 година се движеа од раскошни креации украсени со пердуви и кристали до суптилен минимализам во впечатливи бои. Особено беше забележливо дека и машката мода оваа година привлече големо внимание.

Црвениот тепих го одбележа интересен баланс меѓу гламурот и суптилната елеганција, каква што оваа свеченост и  заслужува. Доминираа елегантни силуети со нагласен струк и богато украсени долни делови. Кај машките комбинации се истакнаа интересни јаки и креативни модни решенија, што уште еднаш потврди дека машката мода последниве години станува сè поважна и сè повеќе ѝ парира на женската.

Фустаните што дефинитивно ќе инспирираат идни модни трендови за вечерни излегувања, свадбени креации и облека за посебни пригоди уште еднаш беа највпечатливи на доделувањето кое традиционално нè потсетува што значи вистински гламур.

Ел Фенинг беше едно од најромантичните појавувања на вечерта. Во специјално изработен фустан од „Живанши“ украсен со ливчиња од вистерија и блескав накит од „Картие“, таа изгледаше речиси етерично – како современа верзија на холивудска принцеза.

На црвениот тепих се појави и Никол Кидман, која остана верна на безвременската елеганција на „Шанел“. Актерката носеше долг, флуиден фустан украсен со пердуви и корсет кој создаваше впечаток на леснотија и софистицираност.

Ен Хатавеј уште еднаш покажа дека совршено го владее стилот на овој престижен црвен тепих. Таа избра црн фустан без прерамки украсен со розови цветни мотиви, со богато скроено здолниште и долг заден дел. Црните ракавици и дијамантскиот накит му дадоа финален допир на класичниот гламур.

На тепихот блесна и Деми Мур, која привлече големо внимание во раскошен фустан од „Гучи“ целосно покриен со пердуви. Зелената силуета со паунски сјај и нагласен корсет преминуваше во драматичен црн заден дел и пердувест изрез околу вратот, создавајќи еден од највпечатливите визуелни моменти на вечерта.

При своето прво појавување на Оскарите, Миа Гот ја напушти препознатливата темна естетика и се појави во речиси бајковита елеганција. Таа носеше кремаст фустан од „Диор“ украсен со слоеви чипка и цветни апликации, со брановидни рабови и цветни детали на корсетот.

Педро Паскал ја изненади публиката со свеж изглед без својата препознатлива брада и мустаќи. Новиот, младешки имиџ го надополни со елегантно одело од „Шанел“, комбинирано со часовник и очила од истата модна куќа – едноставно, но многу ефектно.

Зои Салдана донесе суптилен, но заводлив гламур. Таа носеше црн фустан од „Сен Лоран“ со проѕирен чипкан горен дел и мат здолниште со едноставна линија, дополнет со впечатлив ѓердан од „Картие“ и дијамантски накит.

Тејана Тејлор своето деби на Оскарите го одбележа со максималистички гламур. Фустанот од „Шанел“ со сребрен сјај, кристали и драматичен пердувест заден дел во црно-бели тонови беше еден од највпечатливите модни моменти на вечерта.

Џејкоб Елорди се појави во елегантна комбинација од „Ботега Венета“, дополнета со префинет накит од „Картие“. Минималистичкиот крој и суптилниот луксуз беа совршени за црвениот тепих.

Норвешката актерка Ренате Реинсве привлече внимание со креација од модната куќа „Луј Витон“. Елегантната силуета беше нагласена со висок шлиц на бутот и драматичен заден дел кој го следеше секој нејзин чекор – смела, но исклучително префинета комбинација која донесе силен колористички контраст на црвениот тепих.

Мајкл Б. Џордан се појави во совршено скроено црно одело по мерка, исто така со потпис на „Луј Витон“. Минималистичката елеганција и беспрекорната силуета ја истакнаа неговата харизма – класичен пример како машката вечерна мода може да биде подеднакво впечатлива како и најраскошните фустани.

Џеси Бакли го продолжи својот силен моден настап од сезоната на награди со спектакуларен фустан изработен по мерка од „Шанел“. Креацијата со црвен корсет со спуштени раменици и нежно розова, лесна сукња создаде драматичен контраст на бои.

Чејс Инфинити дебитираше на Оскарите во раскошен фустан во боја на лаванда со потпис на Луј Витон. За свилената креација со асиметрични повеќеслојни делови кои се спуштаа по колкот, според извештаите, биле потребни повеќе од 750 часа изработка.

Тимоти Шаламе се појави во интересна модна комбинација – целосно бело одело од „Живанши“ со широки панталони, бели чевли и црни очила за сонце. Уште еднаш покажа дека не се плаши од модни експерименти.