Судијата Халил Умут Мелер беше физички нападнат и повреден од претседателот на домашниот клуб Фарук Коча по натпреварот помеѓу Анкарагучу и Ризеспор, поради што првенството беше прекинато.

Турската фудбалска федерација одлучи натпреварувањето во сите лиги да продолжи на 19 декември.

Причина за прекинот на натпреварувањето беа немилите настани по натпреварот помеѓу Анкарагучу и Ризеспор, кога физички беше нападнат 37-годишниот судија Халил Умут Мелер. Фарук Коча, претседателот на Анкарагучу, му удри силен удар со тупаница во главата, а потоа додека лежеше на тревникот, судијата беше физички нападнат и од домашни хулигани кои истрчаа на теренот.

Првенството веднаш беше прекинато, а тројцата напаѓачи се приведени и се соочуваат со казна за нападот. Во меѓувреме, судијата Мелер ја напушти болницата каде што беше примен откако беше жртва на физичкиот напад.

Коча е приведен под обвинение за нанесување физички повреди на службено лице. Тој подоцна им се извини на судијата и спортската јавност за своето однесување, си поднесе оставка но изјави и дека „само“ му удрил шлаканица на Мелер.