Французите отсвиреа крај на сезоната
Фудбалската Лига 1 нема да се одигра до крајот по денешната одлука на француската влада.
Владата на Франција денеска донесе одлука да се забранат спортски активности се до месец август, по што Француската фудбалска федерација објави дека лигата дефинитивно се откажува.
Оваа вест ексклузивно ја пренесе новинарот на „Лекип“, Бертнар Латур. Според информациите на новинарот, новата сезона ќе започне во август.
Ваквата одлука е директен удар на УЕФА која инсистираше на првенствата да завршат до крајот на јули, за да може во август да се игра завршницата во Лигата на шампионите и Лигата на Европа.
Убедлив лидер на табелата е ПСЖ, но засега нема никакви најави дали ќе има испаѓање од Лига 1 и кои екипи ќе играат во европските купови и поради тоа во наредните денови ќе има состаноци на челниците на лигата и клубовите за да се изнајде решение.