Фудбалскиот клуб Ливерпул потврди дека нивниот играч Уго Екитике претрпел сериозна повреда на Ахиловата тетива и ќе го пропушти остатокот од сезоната и Светското првенство 2026.

Соопштението на „црвените“ доаѓа еден ден откако селекторот на Франција, Дидие Дешан, изјави дека Екитике нема да игра за репрезентацијата поради сериозна повреда.

Екитике ја скина Ахиловата тетива во вторник во првата половина од реваншот од четвртфиналето на Лигата на шампионите против Париз Сен Жермен. Се стравува дека 23-годишниот напаѓач би можел да отсуствува најмалку шест месеци, а најлошото сценарио е девет месеци.

– Екитике ќе отсуствува до крајот на клупската сезона и нема да може да игра за Франција на Светското првенство ова лето – се вели во соопштението на Ливерпул.

Екитике постигна 19 гола за Ливерпул и Франција оваа сезона, а на „Енфилд“ пристигна од Ајнтрахт Франкфурт за 79 милиони фунти минатото лето.