ФОТО+ВИДЕО | Тејлор Свифт и Тревис Келси се венчаа — откриено кој ги облече младенците, „Емпајер стејт билдинг“ засветли во нивна чест
По неколкумесечни шпекулации, гласини и огромен интерес од јавноста, поп-ѕвездата Тејлор Свифт и НФЛ-ѕвездата Тревис Келси официјално стапија во брак. Веста ја потврди претставник на Свифт за Си-ен-ен.
Препорачано
Свадбената церемонија се одржа во легендарната арена „Медисон сквер гарден“ во Њујорк, која за оваа пригода била претворена во бајковита градина. Иако деталите од самата церемонија останаа строго чувана тајна, познато е дека венчавката ја водел актерот и комичар Адам Сендлер, долгогодишен пријател на двојката. Братот на Тејлор, Остин Свифт, ѝ бил почесен сведок, додека братот на Тревис, Џејсон Келси, ја имал улогата на кум.
Младенците носеле креации на модната куќа „Кристијан Диор От Кутур“, дизајнирани од Џонатан Андерсон, додека обувките биле изработени од „Кристијан Лубутен“.
На свадбата присуствуваа голем број познати личности од светот на музиката, филмот, спортот и телевизијата. Меѓу гостите беа Џенифер Лопез, Ед Ширан, Стивен Спилберг, Том Брејди, Хју Грант, Џесика Алба, Крис Рок, Џими Фалон, Џејсон Судеикис, Гвен Стефани, Итан Хок, Бенсон Бун, како и комесарот на НФЛ, Роџер Гудел.
Додека дел од гостите ја напуштаа прославата во текот на вечерта, организаторите најавија дека свеченоста ќе продолжи и по полноќ.
Надвор од арената со часови се собираа стотици обожаватели надевајќи се дека ќе ја видат двојката и славните гости. Сепак, силното невреме што го зафати Њујорк ги натера најголем дел од нив да си заминат непосредно по официјалната потврда дека Тејлор и Тревис се венчале.
Во чест на свадбата, зградата „Емпајер стејт билдинг“ беше осветлена во сина боја како симболично „нешто сино“ за невестата, а на електронските табли околу „Медисон сквер гарден“ се појави пораката „JUST&T MARRIED“.
Тејлор Свифт и Тревис Келси ја започнаа својата врска во 2023 година, а свршувачката ја објавија во август годинава преку заеднички објави на Инстаграм. Нивната венчавка со месеци беше една од најследените теми во светските медиуми, а интересот дополнително го поттикнаа строгите безбедносни мерки и целосната тајност околу организацијата на настанот.
