Стотици граѓани вечерва учествуваат во осумчасовната блокада на цементарницата „Усје“ во Скопје, додека трае музичката програма со бендови и диџеи на т.н. „Блокадафест“, организиран од граѓанското движење „Стоп за Усје“.

Граѓаните го блокираат влезот во фабриката која ја сметаат за најголем загадувач во градот и бараат таа да се премести надвор од урбаната средина. Протестот се одржува под мотото „Без Усје полесно се дише“, а организаторите рекоа дека сакаат да испратат порака дека „отпорот може да биде гласен, солидарен и креативен“.

„Кога зборуваме за загадување, често слушаме за бројки, за извештаи, за дозволени граници. Меѓутоа, позади тие бројки постојат луѓе. Постојат болни деца коишто кашлаат преку ноќ и растат нивните инхалатори. Постојат родители кои се плашат за сопствените деца. Постојат луѓе како мене што знаат, поготово секоја зима, дека може да биде нов предизвик. Може да биде нова борба, нов страх, дали телото ќе издржи. Никој не избира да се живее. Никој не избира да живее нормално со болни бели дробови, но некој избира да загадува. Свесно и во сопствен интерес. Воздухот не треба да е луксуз“, порача една од говорничките.

Од своја страна, компанијата „Титан Усје“ денеска во соопштение напиша дека „повеќе од седум децении работи како одговорна компанија“, дека „ги почитува сите законски обврски“, како и дека испуштањето прав и гасови од фабриката се мери 24 часа преку независен мониторинг, а досега не биле констатирани надминувања на дозволените граници.

„Стоп за Усје“: Бараме независни мерни станици што ќе овозможат 24-часовен мониторинг на воздухот