Компанијата „Ворнер Брос“ денеска го објави новиот трејлер за второто продолжение на филмската адаптација на научно-фантастичниот роман „Дина“ – „Дина: Втор дел“ („Dune: Part Two“), објави „Варајети“.

„Ги гледам можните иднини, но во секоја од нив – нашите непријатели преовладуваат. Но, јас гледам начин“, вели ликот Пол Атреид, кој го игра актерот Тимоти Шаламе.

Во трејлерот е прикажан Пол Атреид, заедно со ликот Чани (Зендаја) и Слободниците, во неговиот обид да им се одмазди на неговите смртни непријатели, кои му го уништија семејството. Соочен со изборот помеѓу љубовта на својот живот и судбината на познатиот универзум, Пол Атреид се труди да спречи ужасна иднина што само тој може да ја предвиди.

Меѓу непријателите со кои се соочува Атреид во продолжението, како што е прикажано во трејлерот, се злобниот император Шадам (Кристофер Вокен) и „психотичниот“ Фејд-Раута Харконен (Остин Батлер).

Покрај нив, во филмот ќе ги видиме и актерите Флоренс Пју, Леа Сејду, Ребека Фергусон, Џош Бролин, Хавиер Бардем, Дејв Баутиста, Шарлот Рамплинг, Стивен Мекинли Хендерсон и Стелан Скарсгард.

Премиерата на „Дина: Втор дел“ („Dune: Part Two“) ќе се случи на 1 март следната година, кога ќе почне да се прикажува во киносалите ширум светот.