Во рамки на планот за меѓународна соработа, Генералштабот на грчката национална одбрана соопшти дека грчките сили за специјални операции одржале заедничка обука на копно и во вода, борбено пливање и нуркање со македонските сили.

Обуката се одржала од 10 до 21 јули во областа Атика.

Како што известува МИА, од Грција учествувале тимови за специјални операции со пловни средства, а од Република Северна Македонија 12 припадници на силите за специјални операции.

Учеството на вооружените сили во конкретната заедничка обука е во рамките на имплементацијата на Програмата за воена соработка за 2023 година меѓу Грција и Република Северна Македонија и имаше за цел зајакнување на борбениот капацитет и оперативната готовност на учесниците, соопштија од Генералштабот на грчката национална одбрана.

Обуката се одржала во Центарот за обука на специјалните сили во Неа Перамос во западниот дел на областа Атика, поширокиот регион на Атина, како и во поморското подрачје во истиот дел.