Тристан да Куња, најоддалечениот населен остров во светот, се наоѓа на повеќе од 2.700 километри од Јужна Африка и 3.700 километри од најблиските брегови на Јужна Америка.

Овој вулкански остров и неговиот архипелаг претставуваат жариште на ендемска биолошка разновидност и на копно и во море, пишува „Путни кофер“.

Само замислете, се наоѓате на остров, а каде и да погледнете околу себе има само длабоко синило. Вие сте сред Атлантскиот Океан, а првото копно е оддалечено илјадници километри. Ваква осаменост може да се доживее на оваа прекуморска територија на Велика Британија.

„Тристан е активен вулкански остров со реток див свет и дом на 236 британски државјани кои живеат во најизолираната населба на светот, Единбург на седумте мориња, далеку од метежот, во јужниот Атлантски Океан“, се фалат жителите на официјалната веб-страница на островот.

Иако често се споменува во еднина, Тристан да Куња е, всушност, дел од истоимената островска група, која е прекуморска територија на Обединетото Кралство. Архипелагот се состои од главниот остров Тристан да Куња (со површина од 98 квадратни километри), потоа Најтингејл (заедничко име за повеќе помали островчиња), како и островите Инекцесибл и Гоф.

Архипелагот административно потпаѓа под островот Света Елена. Главниот остров е планински, а на него се наоѓа и главниот град на архипелагот, Единбург на седумте мориња.

Највисокиот врв, Кралица Мери, достига 2010 метри. Островите го добиле името по португалскиот морепловец Тристао да Куња, кој ги открил во 1506 година и ги нарекол по себе.

Животот на островот е навистина необичен. Во 1961 година, кога се активирал вулканот, целото население морало да се евакуира во Велика Британија.

Повеќето подоцна се вратиле, но тогаш било утврдено дека дури 50 отсто од жителите страдаат од некој облик на астма, поради што островот го добил прекарот „остров на астмата“.

Научниците се обиделе да откријат зошто астмата е толку распространета на, според загадување, еден од најчистите острови во светот. Заклучиле дека причината лежи во генетиката. На островот постојат само седум презимиња, односно, според експертите, хомоген „генетски базен“.

Истражувањата што се спроведуваат таму би можеле да дадат важни сознанија за лекувањето на оваа болест.

Тоа не е единствената интересна работа поврзана со островот. Жителите се занимаваат со одгледување компири, речиси сите жители работат за островската влада, а брод со основни намирници пристигнува периодично. Најголем дел од приходите ги остваруваат од продажба на поштенски марки, а силни се и во извозот на јастози.

Иако за луѓето, на прв поглед, станува збор за предизвикувачко место за живот, за животните архипелагот е вистински рај.

Островите Гоф и Инекцесибл се природен резерват впишан на листата на светско наследство. На Гоф не живее никој, освен персоналот на метеоролошката станица. Тие се дом на бројни видови китови и ајкули, албатроси, пингвини и фоки.