Светот на социјалните мрежи уште еднаш ја покажа својата неверојатна моќ за обединување преку подвигот на 23-годишниот полскиот инфлуенсер Пјотр Ханке – Латвоганг (Łatwogang), кој успеа да постави нов светски рекорд собирајќи фрапантни 59 милиони долари за децата кои се борат со ракот, пренесува „Ројтерс“.

Во маратонски пренос кој траеше неверојатни 9 дена без престан, тој успеа да обедини милиони луѓе за една благородна цел.

Она што започна како скромна желба да се соберат 500.000 полски злоти, се претвори во национално движење кое го привлече вниманието на најголемите светски ѕвезди.

Целиот настан беше колку едноставен, толку и исцрпувачки. Стримерот седеше пред камерата девет дена, слушајќи ја истата музичка нумера одново и одново на „луп“ (loop). Овој несекојдневен предизвик за издржливост експлодираше на социјалните мрежи, предизвикувајќи пад на системите за донации поради огромниот број луѓе кои сакаа да помогнат.

Како што преносот добиваше на интензитет, во акцијата почнаа да се вклучуваат и врвни спортски и естрадни ѕвезди, меѓу кои беа и фудбалерите Роберт Левандовски и Војчех Шчесни. Нивното вклучување во живо, во комбинација со поддршката од бројни актери и музичари, придонесе приказната да стане вирална и да допре до милиони луѓе.

Некои од познатите личности дури и ја избричија својата коса пред камера како симбол на солидарност со малите херои кои минуваат низ тешки третмани, претворајќи го обичниот стрим во вистинско национално движење.

Конечната сума од над 250 милиони злоти, односно околу 59 милиони американски долари, е веќе донирана за поддршка на децата кои се борат со најтешката болест, рак. Овој настан не само што ги надмина сите досегашни рекорди за хуманитарен стриминг со огромна разлика, туку и докажа дека дигиталната ера нуди нови, моќни начини за будење на емпатијата и заедништвото кај луѓето, создавајќи реална и опиплива промена во животите на оние на кои помошта им е најпотребна.