Американската актерка Ванеса Хаџенс (35) и нејзиниот сопруг, бејзбол играчот Кол Такер (27), ќе станат родители за првпат. Хаџенс присуствуваше на синоќешното доделување на Оскарите и го покажа трудничкиот стомак на црвениот тепих, потврдувајќи ги гласините дека е бремена.

Актерката пристигна во тесен црн фустан на свечената церемонија, со кој го истакна стомакот, а целата комбинација ја искомбинира со дијамантски накит.

Откако објави фотографии од својата моминска вечер, многумина почнаа да шпекулираат дека Хаџенс е бремена. Нејзините обожаватели, воодушевени од идејата дека нивната омилена актерка е бремена, ѝ пишуваа бројни коментари на социјалните медиуми, нешто што не ѝ се допаднало на Хаџенс.

„Јас, буквално, имав конфликт со јавноста. Отидов на моминската вечер и објавив видео. Подолу коментарите гласеа: O, Боже, ти си бремена“, изјавила актерката и додала дека таквите коментари биле груби.

„Се извинувам што не носам корсет секој ден. Јас сум вистинска жена и имам вистинско тело“, изјавила таа.

Да потсетиме, Ванеса Хаџенс и Кол Такер се запознаа во 2020 година, преку Зум. Тие посетувале групна медитација среде пандемијата на коронавирусот.

Двојката ја потврди врската по неколку месеци состанување, а набрзо и се верија. Тие се венчаа пред три месеци во Мексико.