Музиката на бендот „Нокаут“ е љубов, топлина, нежност, суштина… Со безвременските „Лебедот бел“, „Знаеш каде да ме најдеш“, „Телефонскиот број не постои“, „Илјада причини за крај“… вчеравечер ја прославивме зрелоста на бендот со кој израснаа многу генерации — 30 години „Нокаут“!

– Изминатиов период се појавуваа различни бендови со по некоја песна и исчезнуваа. Навистина, не е ни малку лесно да се опстои на сцената. Ние сме со вас 30 години. Триесет години многу љубов и емоции, имам измешани чувства. Ви благодарам што сте вечерва тука, за заеднички да прославиме и да пееме – рече фронтменот на бендот, Никола Перевски – Пере.

На заокружувањето на трите децении, „Нокаут“ одлучија сцената да ја поделат со постарите и помладите колеги и соработници. Огромно воодушевување кај публиката предизвика композиторот Дарко Димитров, кој во дует со Пере ја испеа песната „Дај ми знак“.

– Дарко, ти благодарам за сите убави песни што ни ги направи – му се обрати јавно пејачот.

Уште еден убав дует се случи и помеѓу „Нокаут“ и „Дупер“.

– Ве слушаме од деца, растевме со вашата музика. Ова што вечерва ја делиме сцената за нас значи многу. Ви го честитаме роденденот, да постоите уште најмалку 30 години – рече Илчо од „Дупер“.

Пред бројната публика беше изведена и песната „Месечевиот сјај“ со Миа Перевска, ќерката на Пере. Голема радост предизвика и појавувањето на Влатко Лозаноски.

Шоуменот Игор Џамбазов, сосема очекувано, направи вистински спектакл и вечер за паметење за присутните.

Прегратки на сцената и ново воодушевување се случи и со појавувањето на Дарко Гелев – Брејк.

– Вие „не сте нормални“ – повторуваше Брејк под силни импресии од начинот на кој го пречека салата и како во еден глас се пееја неговите песни, некои и од пред 18 години.

Песната „Временска машина“ го затвори концертот, со надеж кај многумина дека ќе се врати диско-ритамот.

Изразот на лицата на публиката која ја напушташе салата беше исполнет со среќа, радост и возбуда.

„Нокаут“, ви благодариме што постоите!