Започна уривањето на бараките покрај кејот на реката Вардар, во насока од хотелот „Холидеј Ин“ кон трговскиот центар „Џамбо“, каде што беа сендвичарницата „Пласет“ и кафеаните познати како „50“ и „60“ меѓу скопјани.

Според информации од терен, сопствениците на објектите пред околу десет дена добиле известување од Град Скопје дека договорите за користење на просторот се укинати и дека сите објекти, кои се водат како времени, треба да бидат отстранети најдоцна до 19 декември.

Иако дел од угостителите очекувале да продолжат со работа барем за време на викендот, уривањето почна денеска, во петок.

Вработените велат дека биле затекнати од одлуката и дека, иако газдите на објектите наводно се договориле со надлежните, тие останале без работа.

Дел од нив за „Слободен печат“ изјавуваат дека немаат други извори на приходи и дека ќе бидат принудени да побараат социјална помош.