Во ова издание претствуваме еден од нашите последни реализирани проекти, станува збор за стан во центарот на Скопје во кој живее тричлено семејство. Состојбата на станот пред реновирањето не овозможуваше задржување или обновување на постоечките материјали и обработки на површини, планирана и реализирана е целосна обнова на просторот.

Оригиналниот просторен распоред на станот не претрпе измени, со оглед на тоа дека станува збор за зграда проектирана при крајот на шеесетите години од минатиот век кога архитектите строго се придржувале до тогашните нормативи и правила. Со површина од 110 м² оваа станбена единица располага со две спални соби одвоени со ходник и бања, една работна соба со гостински тоалет, дневна соба, трпезарија, кујна, лоѓија и тераси.

Реализирани се три интервенции кои се однесуваат на промената на позицијата на внатрешните ѕидови,една  е во родителската соба со цел да се добие доволен простор за поставување плакар, друга е рушењето на ѕидот помеѓу кујната и трпезаријата и третата е продолжувањето на кујната во лоѓијата, односно делот предвиден за термичка обработка на храна.

Во обработката на внатрешните површини употребени се земјени тонови, природни материјали и текстури. Неутралните тонови предизвикуваат чувство на смиреност и пријатност во амбиентот, а употребата на рефлектирачки материјали ја нагласува просторноста со акцентирање на класичните елементи во современ израз.

Галерија: