По објавувањето на повикот за државните ваучери во износ од 15.300 денари за набавка на електронски уреди, социјалните мрежи се преплавија со огласи во кои студентите ги продаваат добиените ваучери. Иако мерката е наменета за набавка на лаптоп, компјутер или таблет, дел од студентите нудат ваучери за продажба по пониска цена.

Министерката за образование и наука, Весна Јаневска, коментираше дека проектот бил предизборно ветување кое Владата го реализирала, но дека институциите не можат да спречат поединци да ги злоупотребуваат ваучерите.

„Има досетливи студенти кои на разни начини се обидуваат да си го олеснат животот. Ние со тоа не можеме да се справиме. Останува на нивната совест што ќе направат со ваучерите“, изјави Јаневска за време на настан во ДСУ „Партенија Зографски“.

Таа потсети дека 55.000 студенти ќе добијат ваучер, а апликациите преку порталот uslugi.gov.mk се отворени до 20 декември.