По бројните шпекулации дека актерот Тимоти Шаламе и бизнисменката Кајли Џенер раскинале, двојката конечно стави крај на гласините. Се појавија усогласени, држејќи се за рака и насмеани пред фотографите на премиерата на филмот „Супериорниот Марти“ (Marty Supreme) во Лос Анџелес.

Џенер се појави во тесна портокалова креација на „Кроум Хартс“, со длабоко деколте. Фустанот имаше странични изрези, а таа го искомбинира со сребрен ѓердан со голем крст и неколку помали крвчиња. Изгледот го заокружи со нежна шминка и нејзината препознатлива долга, права, црна коса.

Шаламе, усогласен со долгогодишната партнерка, пристигна во портокалово кожно одело и чизми „Кроум Хартс“. Ѕвездата на новиот филм за шампионот во пинг-понг Марти Маузер како моден додаток носеше торбичка за пинг-понг од истиот бренд.

Со појавата на црвениот тепих двојката покажа дека сè уште е заљубена и ги демантираше шпекулациите што се појавија бидејќи не биле видени заедно неколку недели. Според весникот „Дејли мејл“, последен пат биле фотографирани на почетокот на октомври, додека ја следеле утакмицата меѓу „Њујорк јенкис“ и „Торонто блу џејс“ на стадионот „Јенки“.

Гласините за нивната разделба се засилија кога Шаламе реши да избегнува прашања за врската со Џенер, велејќи дека не сака да зборува за приватниот живот.

„Не е од страв, едноставно немам што да кажам“, изјави тој за списанието „Вог“.

Иако на прв поглед необичен пар, нивните имиња првпат се поврзаа во април 2023 година, а јавно се појавија во септември истата година, кога беа фотографирани во страстен бакнеж на концертот на Бијонсе. Сепак, тие се познаваат уште од 2019 година. Иако врската ја чуваат приватна, Џенер редовно присуствува на неговите премиери, како и на доделувањата на Оскарите и Златните глобуси.