Антониа Гиговска својот 25-ти роденден го одбележа со гламурозна прослава во еден скопски локал, опкружена со најблиските, но вечерта доби и посебна романтична нота која никој не ја очекуваше. Прославата беше организирана со прецизно осмислен дрес-код, сите гости облечени во бело, додека просторот беше украсен во елегантни тегет нијанси, со многу свеќи, цвеќе и балони. Во ист стил беше и роденденската торта, која совршено се вклопи во амбиентот.

За оваа пригода, пејачката избра долг бел фустан со впечатливи детали, со кој ја истакна својата витка линија. Антониа блескаше цела вечер, пеејќи и танцувајќи со насмевка, додека во заднината се слушаа и дел од нејзините хитови.

Меѓу гостите беа нејзиниот сопруг Роберт Спасенцовски, неговиот брат Александар со сопругата, братот на Антониа, како и блиски пријатели и соработници, стилистите Марјан Петров и Викторија Бурсаќ, ТВ-презентерот Спасе Јовановски – Рола до Бола и уште многу други.

Но, кулминацијата на вечерта беше кога Роберт приреди изненадување кое ги разнежи сите присутни. Со кутија полна срциња, блескав прстен и букет од 101 роза, тој повторно ја запроси Антониа.

Инаку, парот веќе го има синот Киан (2), а нивното прво запросување се случи во 2023 година, кога заедно ја споделија веста дека ќе станат родители.

Антониа неодамна истакна дека и двајцата одлично се снаоѓаат во родителската улога и дека токму Киан е она што ѝ дало нова смисла на животот.