Еколошката организација „Еко-свест“ информираше дека на нивниот сервис „зелен телефон“ стигнала пријава за огромно количество отпад покрај коритото на река Осојница, општина Виница.

Веднаш по пријавата, „Еко-свест“ поднела барање за инспекциски надзор до општинските инспекциски служби заедно со доставениот доказен материјал од пријавителите.

„После извршениот вонреден инспекциски надзор и утврдените неправилности, изминатиот период активно се работеше на чистење на речното корито и поставување табли за забрането одложување отпад и шут“, соопштуваат од организацијата.

Еко-активистите информираат дека „зелен телефон“ (071 600 333) е бесплатна алатка за граѓаните да пријавуваат еколошки проблеми и да се едуцираат за начините на решавање на истите.

„Сите граѓани можат да остварат комуникација со нас на нашиот бесплатен сервис и да пријават проблем од областа на животна средина и природата. Тимот на ‘Еко-свест’ ќе Ве контактира за сите дополнителни информации, докази, слики и видеа“, информираат од „Еко-свест“.