ФОТО | Првата манекенка создадена со вештачка интелигенција заработува до 10.000 евра месечно
Аитана Лопез е првата шпанска манекенка создадена од вештачка интелигенција и е дело на Рубен Круз, нејзиниот дизајнер и основач на маркетинг агенцијата „Клулес“ (The Clueless), кој ја направил кога минувал низ тежок период, бидејќи немал многу клиенти, пишува „Еуроњус“.
„Почнавме да ја анализираме нашата работа и сфативме дека многу проекти беа ставени во мирување или откажани поради прашања надвор од наша контрола. Честопати тоа беше вина на инфлуенсерот или моделот, а не проблем со дизајнот“, изјавил Круз.
И тогаш се појавила револуционерната идеја – тој и неговите колеги решиле да создадат свој модел за клиентите. Така се родила Аитана, виртуелна манекенка која заработува и до 10.000 евра месечно.
„Го направивме тоа за да не зависиме од други луѓе кои имаат големо его или едноставно сакаат да заработат многу пари позирајќи“, објасни Круз, кој е горд што неговата манекенка веќе стана заштитно лице на „Биг“ – компанија за спортска опрема.
За само неколку месеци таа има повеќе од 121.000 следбеници на Инстаграм и нејзините фотографии имаат илјадници прегледи и реакции. Таа дури добива и приватни пораки од познати личности кои не се свесни дека таа не е вистинска личност, а наскоро би требало да добие и пријателка, модел по име Маја.
Ова се покажа како хит досега, а Круз изјавил дека неговата агенција е преплавена со барања од брендови кои сакаат да имаат свој персонализиран модел.