Во Мјанмар е пронајден редок рубин тежок дури 11.000 карати, што го прави втор најголем рубин по тежина некогаш откриен во оваа азиска земја, објавија државните медиуми, а пренесе „Асошиејтед прес“.

Скапоцениот камен, тежок околу 2,2 килограми, бил пронајден во близина на градот Могок, во регионот Мандалеј – област позната како срцето на индустријата за рубини и скапоцени камења во Мјанмар.

Според државниот весник „Глобал њу лајт оф Мјанмар“, рубинот бил откриен во средината на април, веднаш по традиционалниот новогодишен фестивал.

Иако е речиси двојно помал од легендарниот рубин од 21.450 карати пронајден во 1996 година, експертите сметаат дека новото откритие има поголема вредност поради неговиот квалитет и боја.

Рубинот има виолетово-црвена нијанса со жолтеникави тонови, висока класа на боја, умерена транспарентност и исклучително рефлектирачка површина.

Мјанмар произведува околу 90 проценти од светските рубини, најмногу од регионите Могок и Монг Хсу. Трговијата со скапоцени камења, легална и нелегална, претставува еден од главните извори на приходи во земјата.

Во изминатите години бројни организации за човекови права, меѓу кои и британската организација „Глобал витнес“, ги повикаа светските златари и компании да престанат да купуваат камења од Мјанмар, тврдејќи дека индустријата со децении претставува важен финансиски извор за воените власти.

Регионот каде што е пронајден рубинот со години е погоден и од вооружени конфликти. Градот Могок во 2024 година беше преземен од герилската група Таанг националноослободителна армија, која ја претставува етничката заедница Палаунг. Подоцна контролата врз рудниците повторно ѝ била предадена на армијата на Мјанмар како дел од договор за прекин на огнот посредуван од Кина.