Американците Џон и Мелоди Хенеси ја продале својата куќа во Флорида, нивната компанија и најголемиот дел од нивните средства во 2020 година и решиле да патуваат. Меѓутоа, сега не живеат на копно, туку нивниот дом е бродот за крстарење и секој ден се закотвуваат во различно пристаниште. Отпрвин сакале да живеат во кампер и да ги истражуваат САД, но набрзо им здосадило постојано да возат, пишува „Њујорк пост“ (NY Post).

Џон тогаш наишол на реклама на Фејсбук за 274-дневно крстарење со „Ројал Карибиан“ (Royal Caribbean) и решил да се пријави за деветмесечното патување.

Оттогаш, парот отпатувал во Австралија, Нов Зеланд, краеви во Јужниот Пацифик – и моментално пловат околу Доминиканската Република. Нивниот живот сега е повозбудлив, но и поевтин, тврдат тие.

– Сега имаме сметка за телефон, сметка за брод и неколку сметки за кредитна картичка кога одиме на брегот, но тоа е сè – изјавил Џон за „Скај њуз“ (Sky News).

– Немаме веќе хипотека или куќни трошоци. Веќе немаме осигурување на автомобил, осигурување на имот или сметки за комунални услуги. Списокот продолжува – открива гордиот патник.

Двојката обично се населува на некоја дестинација и ја истражува три до пет дена. Тие често истакнуваат дека патувањето низ светот на брод е економично и забавно.

– Крстарењето е всушност поевтино од живеењето на копно. Сега трошоците ни се околу половина од она што го трошевме кога живеевме на копно – велат тие.

Имаат план за патување за цела наредна година, а наскоро планираат да се качат на резиденцијалниот брод за крстарење Вила Ви, на кој купиле кабина.

– Сакавме да купиме кабина за да ја дизајнираме како што сакаме. Тоа ќе биде наш дом, планираме да останеме на тој брод најмалку 15 години – изјави Мелоди.

Вила Ви е еден од првите ол инклузивни бродови за крстарење што нуди постојан престој – околу 30 отсто од патниците на бродот ќе бидат постојани жители, а 85 отсто од патниците се Американци.

Бродот сѐ уште е во изградба и има внатрешни кабини по цена од 89.593 евра и оние со балкони со поглед на океанот околу 225.340 евра, а има месечен надомест од речиси 7.239 евра.