ФОТО | Повторно редици во факултетите: Големи гужви за упис и заверка на семестар во пандемиски услови
Како и во првиот уписен рок кој помина во пандемиски услови, слични гужви, турканици и редици одново се забележани на факултетите при УКИМ во Скопје.
Ова искуство го сподели студентот Стефан Петровски, кој за овој проблем ја контактираше редакцијата на „Слободен печат“, а на својот Фејсбук профил објави и фотографии од редиците студенти кои чекаат за упис и заверка на семестар.
„Не знам како и зошто ова е дозволено пак да се случува. Претходниот уписен рок имав иста ваква објава која заврши до медиумите и доби силна реакција од јавноста и студентите за непрофесионалното и загрозувачкото однесување на УКИМ. Минатиот уписен рок на тапет беше ставен Филолошки факултет бидејќи од повеќето факултети на УКИМ, беше меѓу единствените кои имаа вакво редење како за во банка, и традицијата еве продолжува пак“, напиша Петровски на Фејсбук.
Тој вели дека по неговата реакција за време на првиот уписен рок, надлежните во УКИМ реагирале со тоа што документите на студентите рачно се оставале во папки, по што студентите биле контактирани од матичниот референт за тоа дали е се во ред со нивните податоци, но потенцира дека сега одново се случуваат непотребни турканици во време на пандемија.
„Од името на студените мислам дека можам само да прашам дали овој пат немаше слободни картонски кутии и папки за документите. Бидејќи сепак нели не се компјутери во прашање и делува доста традиционално и средновековно — како што е и сѐ друго на УКИМ“, додава разочараниот студент.
