Додека дестинации како Париз, Барселона и Рим често се преполни и скапи, на другиот крај од туристичката мапа постојат места што годишно ги посетуваат само неколку илјади луѓе. Меѓу нив се Кирибати, Маршалски Острови, Ниуе, Микронезија и Монсерат.

Патувањата, без разлика дали се деловни или туристички, денес се важен дел од современиот живот и значаен двигател на економијата во многу земји. Најголем број туристи и понатаму привлекуваат земји како Франција, Шпанија и Соединети Американски Држави, додека меѓу градовите се издвојува Бангкок, кој годишно го посетуваат околу 22 милиони луѓе. На второ место е Париз со повеќе од 19 милиони меѓународни пристигнувања.

Сепак, паралелно со масовниот туризам постои и друга страна на глобалните патувања – дестинации што остануваат надвор од главните туристички текови. Причините се бројни: географска оддалеченост, високи трошоци за патување, недоволно развиена инфраструктура, како и перцепции за безбедност или политичка стабилност. Особено погодени се малите островски држави во Пацификот, до кои често е тешко и скапо да се стигне.

Стручњаците истакнуваат дека помалиот број посетители не значи и послабо туристичко доживување. Напротив, многу од најмалку посетените земји нудат недопрена природа, помалку гужви и поавтентично искуство, често и по пониски цени во споредба со популарните дестинации.

Кирибати

Според податоците на Светска туристичка организација на Обединетите нации, титулата за најмалку посетена земја ја носи Кирибати. Оваа пацифичка држава имала околу 2.000 посетители во 2022 година, што е значителен пад во однос на периодот пред пандемијата. Причините вклучуваат последици од ковид, ограничена инфраструктура и сè поизразени климатски промени.

И покрај тоа, Кирибати нуди извонредни природни убавини. Морските екосистеми привлекуваат љубители на нуркање и недопрена природа, додека заштитеното подрачје на Феникс Островите е на листата на светско наследство на УНЕСКО. Сепак, пристигнувањето останува предизвик поради ограничените и нередовни авионски линии.

Маршалски Острови

Покрај Кирибати, меѓу најмалку посетените се и Маршалските Острови, кои и пред пандемијата имале само неколку илјади туристи годишно, а сè уште се опоравуваат. Овие острови се познати по богатата морска флора и фауна, но и по историјата поврзана со Втора светска војна и нуклеарните тестирања.

Ниуе

Меѓу ретко посетените дестинации е и Ниуе, самоуправна островска држава во слободна асоцијација со Нов Зеланд, која се издвојува по отсуството на масовен туризам. Посетителите тука не се соочуваат со гужви и метеж, туку уживаат во мир и едноставен начин на живот.

Микронезија

Микронезија, сместена меѓу Маршалските Острови и Палау, нуди слична комбинација од природни убавини и историски локалитети, вклучувајќи и потонати бродови од Втората светска војна.

Монсерат

Од друга страна, Монсерат е пример за дестинација чиј туризам бил сериозно погоден од природни катастрофи. По разорната ерупција на вулканот во 1995 година, голем дел од островот бил напуштен.