Еден од најпосакуваните парфеми, токму пред Денот на вљубените, доби посебно, романтично издание. Гуд грл блаш (Good Girl Blush) од Каролина Херера сега доаѓа во препознатливото шишенце во форма на висока потпетица, но овојпат украсено со црвени срца – разиграно и заводливо дизајнирано, совршено вклопено во љубовната атмосфера на февруари.

Зад мирисната композиција стојат парфимерите Quentin Bisch, Shyamala Maisondieu и Christophe Raynaud. Станува збор за цветен мирис кој веќе има своја верна публика.

Почетната нота на парфемот е свежа и блескава, благодарение на нотите од бергамот и мандарина, надополнети со нежна бадеместа мекост што му дава топол тон уште од првиот момент. Во срцето на мирисот доминираат вода од роза, божур и иланг-иланг, создавајќи кремаста, женствена цветност која делува елегантно, но не нападно.

Базата е нежна и пријатна – ванила и тонка-зрно ја заокружуваат композицијата со слатка, мазна топлина што останува на кожата и остава впечаток на софистицираност. Токму контрастот меѓу свежите цитрусни ноти и меките цветни акорди, со суптилна гурманска подлога, го прави Good Girl Blush мирис на кој лесно му се враќате.

Важно е да се напомене дека станува збор за лимитирано, празнично издание, но во шишенцето се наоѓа истиот оригинален Good Girl Blush од 2023 година. Со други зборови, познатиот мирис сега е спакуван во поромантично, колекционерско руво – идеален како подарок или како мал луксуз за себе.

Новото шишенце ги воодушеви жените на социјалните мрежи. „Совршено“, „Прекрасен и мириса божествено“, „Мора да се има“ – се само дел од коментарите што се редеа под објавите.