Откако во катастрофалните шумски пожари во август изгореа речиси 10 илјади хектари шума во регионот на Пехчево и Берово, надежта дека природата ќе помогне во обновата на уништените шумски предели полека, но сигурно се враќа. Од сликите кои ги објави на својот Фејсбук профил планинарот и шумски полицаец Марјан Митриновски од денешната обиколка на опожарената шума во Пехчевско, може да се види дека дабовата шума, дури и онаму каде е навидум целосно пеплосана, само неколку месеци по уништувачката огнена стихија, на некои места почна да се обновува.

Митриновски за „Слободен Печат“ вели дека има ронка надеж и за дел од боровите насади кои беа заштитен знак на Малешевијата.

„И кај боровите ќе почне обновата, но во колкава мера, сѐ уште е рано да се каже“, вели тој.

Деновиве месното население врши сеча на изгорениот дрвен фонд во Пехчевско. Шумарските експерти по катастрофалните пожари во Пехчево и околината предупредија дека е неоходно расчистување на теренот од изгорената дрвна маса и друг изгорен отпад, за да се успее со планираните активности околу садење и обновување на шумскиот фонд во Малешевијата.