Поранешниот шпански премиер Хозе Луис Родригес Сапатеро се соочува со нова истрага откако истражителите во неговиот сеф пронашле луксузни часовници и накит, објави Ројтерс.

Сапатеро, социјалист кој управуваше со Шпанија од 2004 до 2011 година и кој и натаму има значајно влијание во владејачката партија, веќе е под истрага поради сомнежи за тргување со влијание поврзано со државното спасување на шпанската авиокомпанија „Плус Ултра“ во 2021 година.

Во рамки на таа истрага, властите минатиот месец ја пребарале неговата канцеларија. Шпанските медиуми објавија дека таму биле пронајдени ѓердани, алки, прстени и обетки проценети на околу 1,2 милион евра. Портпаролот на Сапатеро, Луис Аројо, изјави дека поранешниот премиер „пред судијата ќе даде објаснувања“ поврзани со пронајдениот накит.

Близок сојузник на Педро Санчез

Според пишувањата на шпанските медиуми, накитот е изработен од злато, сафири и смарагди со потекло од Замбија и Тајланд. Истражителите веруваат дека Сапатеро не може да докаже дека за тој накит биле платени потребните царински давачки. Поради тоа против него сега се води истрага и за даночна измама и за криумчарење.

Неговите соработници претходно тврдеа дека станува збор за предмети поврзани со семејно наследство, пренесува АФП. Сапатеро е повикан на сослушување пред суд подоцна овој месец.

Иако и други шпански премиери претходно сведочеле во корупциски предмети, ова е првпат во поновата историја на земјата поранешен претседател на владата формално да биде ставен под истрага. Најновиот развој на настаните е дополнителен удар за Социјалистичката партија на актуелниот премиер Педро Санчез, чиј близок сојузник е Сапатеро.

Негира дека некогаш примил пари од авиокомпанијата

Во случајот „Плус Ултра“, Сапатеро се сомничи дека го искористил своето политичко влијание за да обезбеди државен пакет помош за таа авиокомпанија вреден 53 милиони евра и дека за возврат примил провизија. Тој повеќепати ги отфрли сите обвинувања и негираше дека некогаш примил пари од „Плус Ултра“.

Пакетот помош бил одобрен од државен фонд основан за поддршка на стратешки важни компании погодени од пандемијата на ковид-19. Полицијата минатиот месец го пребарала и седиштето на Социјалистичката партија во Мадрид и запленила повеќе документи во рамки на истрагата за наводна корупција.

Претреси биле спроведени и во домовите на високи партиски функционери и на еден истакнат бизнисмен. Со обвиненија се соочуваат и повеќе други лица, меѓу кои сопругата и братот на Санчез. Сите отфрлаат каква било одговорност.

Од накит до приватни писма — скриениот свет на Мерилин Монро оди на аукција