На падините на планината Ингино над италијанскиот град Губио, секоја година, од почетокот на декември до неколку дена по празникот Светите три мудреци, најголемата елка во светот ја осветлува ноќта, објави „Пункуфер“.

Губио е еден од најубавите средновековни градови во централна Италија, а е познат и по легендата за Свети Франциск и Волкот од Губио. Спектакуларната светлосна атракција за прв пат била инсталирана во 1981 година, а во 1991 година била запишана во Гинисовата книга на рекорди. Елката, која се состои од повеќе од 700 светла поврзани со приближно 8.500 метри електрични кабли, може да се види на оддалеченост од неколку километри.

Целата инсталација е висока околу 750 метри, широка 450 метри во основата и е голема колку триесет фудбалски игралишта. Токму поради својата монументалност и импресивност, таа привлекува илјадници посетители од светот секоја година.

 

View this post on Instagram

 

A post shared by Italy 🇮🇹 Italia Travel | Hotels | Food | Tips (@italyexplores)

Обликот на елката е направен со повеќе од 300 зелени светла, додека внатрешноста е исполнета со над 400 разнобојни ламби. Ѕвездата на врвот зафаќа површина од околу илјада квадратни метри и е составена од повеќе од 250 светла, кои стигнуваат сè до базиликата Свети Убалдо, светецот-заштитник на градот.

Од самиот почеток, проектот го одржува група волонтери. Светлата традиционално се палат на 7 декември, со свечена церемонија на која присуствуваат истакнати личности од културата, науката и хуманитарната работа, меѓу кои биле и двајца папи.

Секој што сака може да учествува во иницијативата „Посвои светлина“ во која со донација од 15 евра може да се посвои една од светилките на елката и да се посвети на близок. Секоја ламба е достапна за посвојување за време на божиќната сезона, а повторно се отвора следната година за нови посветувања.