В четврток од 20.45 часот на стадионот „Паркен“ во Копенхаген најдобрата македонска фудбалска репрезентација ќе игра против Данска во полуфиналето од плејофот за пласман на Светското првенство 2026.

Избраниците на селекторот Гоце Седлоски ги очекува тешка задача, пред себе имаат квалитетна селекција која ја има фаворитската улога, но нашите фудбалери ветуваат борба за секоја топка на теренот.

Доколку успееме да направиме изненадување и ги елиминираме Данците, на 31 март во финалето повторно на гости за противник ќе го имаме победникот од дуелот помеѓу Чешка и Ирска.

Македонските фудбалери вечерва го имаа официјалниот тренинг на стадионот „Паркен“ во Копенхаген, а како што е веќе познато, нема повеќе билети, се очекуваат полни трибини, а ќе присуствуваат и над 1000 македонски навивачи кои ќе ја даваат поддршката до нашите репрезентативци на патот да се обезбеди поволен резултат.

-Данска е силна, но ние сме фокусирани на нашата игра. Во вакви натпревари деталите одлучуваат, а верувам дека имаме што да покажеме. Благодарност до навивачите за поддршката, тоа ни дава дополнителна сила – вели селекторот Седлоски.