Муштерија во ресторан за брза храна во американската сојузна држава Њу Хемпшир оставил дарежлив бакшиш од 16.000 долари за два хот-дога со помфрит, објавија американските медиуми.

Човекот седнал во градината на ресторанот, нарачал два хот дога. Испил и кока-кола, пиво и текила, што сѐ заедно го чинело 37 долари. Покрај платената сметка следувал и бакшиш од 16.000 долари.

„Немој сѐ да потрошиш одеднаш“, се пошегувал тој со келнерката, која според зборовите на нејзиниот шеф Мајк Зарела и сопственик на ресторанот во Лононбери, на почетокот не ни погледнала во сметката.

– Кога конечно виде дека на сметката е испишан бакшиш од 16.000 долари, беше шокирана. Потоа отиде кај колешките, кои сите заедно се вратија и се заблагодарија. Беа пресреќни – изјавил Зарела за Си-ен-ен.

Бакшишот бил даден на 12 јуни, но Зарела не сакал да ја сподели оваа приказна со луѓето сѐ до 21 јуни, бидејќи чекал да види дали сметката ќе помине.

Фото: Facebook

Една недела откако го оставил бакшишот, муштеријата почнал редовно да доаѓа во ресторанот, па Зарела му пришол.

– Отидов кај него и му се заблагодарив. Го прашав дали е сигурен, бидејќи не е пријатно да се земе толку голем бакшиш. Ако по грешка ги оставил и ако ги побараше парите назад, ќе му ги вратевме, но тој рече дека сака вработените да ги добијат парите – рекол Зарела.

Келнерките одлучиле да ги поделат парите рамноправно со вработените од кујната. Зарела исто така не земал ништо.