Претседателката на Европската комисија (ЕК), Урсула фон дер Лајен потврди дека ќе биде предложен механизам за споделување на вакцините со земјите кои не се членки на Европската Унија (ЕУ), јави дописничката на МИА од Брисел.

Со ова, шефицата на ЕК ја потврди вчерашната најава на еврокомесарката за здравство, Стела Кириакидес за механизам со кој треба да се помогне на земјите со низок и со среден приход кои не можат да си дозволат набавка на вакцини.

– Треба да ги поддржиме нашите соседи да ги вакцинираат работниците во првите редови, на Западен Балкан, од Источното Партнерство, во Африка и за тоа Европската комисија предлага механизам за споделување на вакцините или директно или преку Ковакс, изјави утрово Фон дер Лајен пред Европскиот парламент и во пресрет на утрешниот Самит на лидери на ЕУ, на кој ќе се разговара на оваа тема.

Претседателката ги прекори и земјите членки на ЕУ затоа што не покажуваат солидарност за вакцините.

– Некои ќе прашаат како да споделиме кога и самите не сме сите вакцинирани, ним им одговарам дека не е само солидарност во прашање, туку и личниот интерес, порача Фон дер Лајен, истакнувајќи дека во прашање е кредибилитетот на ЕУ на геополитички план.

Фон дер Лајен додаде дека „оние кои ќе покажат поддршка нема да бидат заборавени, но оние кои не ја покажуваат ќе бидат запаметени, од многу различни причини”.

– Европа мора да биде на добрата страна на историјата и човечноста, порача шефицата на Еврокомисијата.

Според најавата на Кириакидес се очекува ЕК да обезбеди 70 милиони евра за Западен Балкан за набавка на вакцините и уште 50 милиони евра поддршка преку Светската здравствена организација (СЗО). СЗО ги предупреди богатите земји во светот дека „себичноста” за вакцините ќе доведе до морална криза.