Филмот „Фјорд“ (Fjord) на романскиот режисер Кристијан Мунџиу синоќа ја освои „Златната палма“ на 79-от Меѓународен филмски фестивал во Кан, објавија француските медиуми.

„Фјорд“ е европска драма што ги следи Михаи и Лизбет, конзервативен романско-норвешки пар кој се преселува од Романија во зафрлено норвешко село, каде што се соочуваат со истрагата од локалните власти и културните судири.

Мунџиу ја доби својата прва „Златна палма“ во 2007 година за филмот „4 месеци, 3 недели и 2 дена“.

Гран при наградата ја освои остварувањето „Минотаур“ на рускиот режисер во егзил Андреј Звјагинцев, додека наградата на жирито ја доби филмот „Сонуваната авантура“ на режисерот Валеско Гризебах.

Наградата за најдобра режија им припадна на Хавиер Калво и Хавиер Амбрози за филмот „Црната топка“ („The Black Ball“ (La Bola Negra)), како и на Павел Павликовски за филмот „Татковина“ (Fatherland).

Наградата за најдобра актерка ја добија Вирџини Ефира и Тао Окамото за улогите во филмот „Одеднаш“ (All of a Sudden).

Најдобри актери се Валентин Кампањ и Емануел Макија за нивните улоги во филмот „Кукавица“ (Coward).

За главната награда „Златната палма“ оваа година се натпреваруваа 22 филмови.

Претседател на жирито оваа година беше јужнокорејскиот режисер Парк Чан Вук, а во жирито беа американската актерка Деми Мур и кинеската режисерка Клое Жао.

Минатогодишниот добитник на „Златната палма“ беше иранскиот режисер и дисидент Џафар Панахи за „Тоа беше само несреќа“ (It Was Just an Accident), кој беше снимен во тајност.

Денеска се доделува Златната палма во Кан — критичарите годинава немаат јасен фаворит