Финансиска поддршка од ФИТР за технолошки развој на 69 компании
Државата ќе ја помогне реализацијата на инвестициите во компаниите со 4 милиони и 200 илјади евра, а компаниите ќе учествуваат со речиси 10 милиони евра.
Фондот за иновации и технолошки развој (ФИТР) ќе им додели средства на 69 компании преку кофинансирани грантови за технолошки развој, а средствата ќе бидат наменети за набавка на опрема, дигитализација, софтвер за подобрување на организацијата и за реализација на проекти за енергетска ефикасност.
Државата ќе ја помогне реализацијата на инвестициите во компаниите со 4 милиони и 200 илјади евра, а компаниите ќе учествуваат со речиси 10 милиони евра.
– Со денешното објавување на резултатите, поттикнуваме инвестициски циклус во приватниот сектор на македонската економија од 14 милиони евра што е исклучително важно во период на економско заздравување, оцени директорот на ФИТР Јован Деспотовски.
Проектите треба да се реализираат во следните 12 месеци, а според структурата главно доминираат малите и микро компании.
Меѓу избраните најмногу доминираат проектите од областа на здравството и медицината, по што следуваат оние од трговијата и градежништвото.
Компаниите кои не се избрани ќе имаат можност да се произнесат пред Комитетот за одобрување на инвестиции и доколку изнесат соодветни аргументи, нивниот проект повторно може да биде разгледан со можност да биде прифатен.