„Оваа влада народот го праќа на езера, за тие да летаат на море со владин авион, рече претседателот на СДСМ, Венко Филипче, на денешната прес-конференција. Филипче вели дека владата на ВМРО-ДПМНЕ „со погубните политики сè повеќе ја изолира државата, граѓаните од ден во ден живеат потешко, додека власта се луксузира“.

„Од Македонија прават слепо црево на Балканот и не изолираат секојдневно. На граница не може нормално да поминете. На лето ќе се чека меѓу осум и десет часови. На родителите со мали деца им велат – „Што ви треба море? Одете на езера и планини”, додека тие со државниот владин авион одат на море и живеат во луксуз. Затоа, мора да застанеме на патот на оваа криминална организација“, рече Филипче.

Тој додаде дека Владата на ВМРО ги уништува соништата на младите и достоинството на повозрасните генерации.

„Им ги зедоа соништата на младите луѓе кои само гледаат како да избегаат од тука. А на старите им ги земаа достоинствените години во пензија. На родителите им ја зедоа можноста за нормално воспитување и школување на децата. Народот да гладува, а тие да носат часовници од 60 илјади евра, да купуваат нов авион додека некој нема за леб. Банда обична. Собир на криминалци кои ве лажат“, рече Филипче.

На прес-конференцијата Филипче порача дека владата на ВМРО-ДПМНЕ „нема право да ја жртвува иднината на државата“, ,како и дека „Македонија и Европа се нашиот идентитет“.

„Јас ви ветувам, поради сето ова, тие ќе одговараат. Реформи, правда и Европа. Нема враќање назад. Сакаме во Европа. Сакаме успешна и богата Македонија, а не европска Венецуела. Сакаме светла иднина за нашите деца. Сакаме достоинствена Македонија и тоа да биде за сите граѓани на земјава. Европа е нашиот национален интерес. Македонија треба да биде во Европа. Македонија и Европа се нашиот идентитет”, рече Филипче.