Еден од најистакнатите македонски ракометари на сите времиња, Филип Миркуловски, добива нова улога во националниот систем и ќе ја предводи новоформираната репрезентација за играчи до 13 години.

Популарниот Жути, кој веќе ја извршува функцијата спортски координатор на сите селекции, сега ќе работи директно со најмладите категории. Целта е рано препознавање и развој на талентите, кои подоцна ќе бидат подготвени за повисоките возрасни нивоа. Покрај оваа селекција, формиран е и национален тим до 15 години, а кормилото на оваа генерација му е доверено на Никола Матлиески.

Од Ракометната федерација на Македонија информираа и за награда за сениорите, машката репрезентација ќе добие премија од два милиони денари (32.500 евра) за настапот на Европското првенство 2026 во Данска.