Поранешниот македонски кошаркарски шампион Работнички повторно се врати на поразите, откако на отворањето на 19. коло од домашната елита загуби на гостувањето кај Феникс со 77-83.

Тимот од Гази Баба по вторпат сезонава излезе како победник во меѓусебните пресметки со градскиот ривал и со тоа обезбеди подобар меѓусебен биланс, што може да биде пресудно доколку двата тима ја завршат сезоната со ист број бодови. =

Клучен се покажа самиот почеток на средбата. Домашните отворија со силен ритам и со серија од 9-0 брзо се одлепија, а до крајот на првата четвртина стигнаа и до двоцифрена предност од 28-16. Работнички успеа да се врати во игра во вториот период, кога со низа од седум поени се доближи на само еден поен разлика (34-33), но Феникс не дозволи целосен пресврт и на паузата замина со водство од 42-36.

Во продолжението се повторуваше истото сценарио, гостите неколкупати се приближуваа на еден напад негатива, но секогаш следуваше одговор од домаќините. Драмата кулминираше во самата завршница. При резултат 78-77 за Феникс, во последните секунди Рахама погоди тројка со звукот на сирената и практично го реши прашањето за победникот, бидејќи Работнички во следниот напад не успеа да возврати.

Најефикасен кај победничката екипа беше Дајсон со 23 поени, додека Рахама и Златевски додадоа по 14, а Ниа 11 поени. Кај Работнички најрасположен беше Ефремовски со 24 поени, но дури 19 од нив ги постигна уште во првото полувреме.