Фудбалскиот клуб Фенербахче официјално соопшти дека поднел жалба до УЕФА поради, како што наведува, спорното судење на холандскиот арбитар Алард Линдхаут на натпреварот против Викторија Плзен во 4. коло од Лигата на Европа, кој заврши без голови (0:0).

Од клубот бараат европската куќа на фудбалот да ги испита спорните ситуации со „должна сериозност и итност“, нагласувајќи дека погрешните одлуки на судијата директно влијаеле врз исходот на мечот.

Најконтроверзен момент беше ситуацијата во судиското продолжение, кога по прегледување на ВАР-снимката не беше досуден пенал за Фенербахче, бидејќи беше оценето дека на почетокот на акцијата имало прекршок за домашниот тим – нешто што турскиот клуб го смета за погрешна одлука.

Фенербахче најави дека јавноста навремено ќе биде информирана за понатамошниот развој на настаните.