Како што информира „Мундо Депортиво“, Барса ќе испрати тужба до шпанското издание „АБЦ“ и новинарот Салвадор Сострес.

Причина за скандалот е колумната објавена од Сострес за натпреварот помеѓу Барселона и Ференцварош (5:1) во рамките од Лигата на шампионите.

– Има нешто во стилот на трчање на Ансу што изгледа како газела или млад црн мантеро (шпански збор за уличен продавач на нелегална стока) – напиша Сострес.

Соиграчот на Фати, Антоан Гризман, беше еден од играчите кои веднаш реагираа.

– Ансу е исклучителен млад човек кој заслужува иста почит како и секое човечко суштество. НЕ за расизам и НЕ за лошо однесување – порача францускиот репрезентативец Гризман.

„АБЦ” веднаш реагираше и испрати извинување од Сострес.

– Мојата намера беше да ја пофалам убавината на движењето на Ансу и неговиот талент како многу млад играч. Некои изрази беа сфатени како расистички навреди. Длабоко се извинувам за недоразбирањето и се извинувам доколку некој се чувствувал навреден – вели новинарот.

Фати е роден во Гвинеја-Бисао и имигрирал со своето семејство во Шпанија кога имал шест години. Сега има 17 години и тој е еден од најперспективните играчи на Барселона и голема надеж во светскиот фудбал.