Денеска во својот прв натпревар од групата „Д“ во новата сезона од ЕХФ Европската лига екипата на Еурофарм Пелистер загуби од Скандерборг-Архус со 27:30.

Играчите предводени од Ларс Валтер имаа голема поддршка од трибините во салата „Боро Чурлевски“ – Битола, но на крајот Данците беа поуспешни и ги освоија првите бодови.

Стартот беше одличен за македонскиот вицешампион, го контролираа резултатот, имаше највисоки „плус четири“ (7:3). Се одржуваше добрата разлика, на семафорот стоеше и 10:7, но тука како да застана домашниот тим, а тоа го искористија ривалите со серија од 9:2 за на паузата да имаат предност од 12:16.

Сега противниците беа тие кои го контролираа водството, стигнуваа и неколку пати до највисоки „плус пет“ (16:21, 17:22). Еурофарм Пелистер го даваше максимумот за да се врати во игра, тоа успеа да го направи, при негатива од 20:25 направи серија од 6:2 за само „минус еден“ (26:27).

Нашиот претставник не ги искористи своите шанси за комплетен пресврт, Данците се одбранија во финишот, беа поснаодливи, врзаа неколку погодоци во низа за 26:30 и тука веќе беше познат победникот. По пет погодоци за Е. Пелистер имаа Хенеберг и Хосни, а на спротивната страна 11 голови беа дело на Теигум.

Во другите мечеви од првото коло Фуксе Берлин со 27:38 славеше над Мотор, додека Бидасоа Ирун со 35:26 го надигра Агуас Санташ Миланеза.