Европската Унија размислува да воведе санкции врз Кина поради нејзината поддршка на Русија во војната против Украина, изјави неименуван дипломат за бриселското „Политико“.

Овој потег доаѓа по извештајот на „Ројтерс“ од јули дека мотори за беспилотни летала произведени во Кина биле тајно испорачани во Русија преку „параван компании“ со цел да се избегнат западните санкции, според порталот.

„Извештајот е точен и покажува дека Кина ја зголемува својата улога, и квантитативно и квалитативно. Може да се каже дека без кинеската поддршка војната сега би изгледала многу поинаку“, рече дипломатот.

Тој додаде дека „по август, Брисел ќе инсистира на санкции“ и дека ЕУ сака „дијалог, но и акција“, пренесе „Политико“.