Претседателот на Општинската организација (ОО) на СДСМ во Струмица, Марјан Даскаловски, попладнево на „Фејсбук“ објави дека поднел оставка од партиската функција, која веќе му ја доставил на лидерот на партијата, Венко Филипче.

Даскаловски во објавата пишува дека одлуката ја донел „со мирна совест и чисто срце, водена пред сè од лични причини“.

„Изминатиот период беше исполнет со многу работа, заеднички победи, но и предизвици со кои се соочувавме секогаш со крената глава и со мисла за доброто на Струмица. Чест ми беше да ја предводам Организацијата и да работам со луѓе кои искрено го сакаат својот град. На идниот претседател и на новото раководство им посакувам многу успех, мудрост и нова енергија во водењето на партијата на локално ниво“, вели Даскаловски, кој им се заблагодарува на соработниците од партијата за поддршката и укажаната доверба.

Даскаловски беше кандидат на СДСМ за градоначалник на Општина Струмица на минатогодишните локални избори, и загуби уште во првиот круг од противкандидатот од ВМРО-ДПМНЕ, Петар Јанков.

Има ли СДСМ сила за целосен пресврт?