ЕУ: Минувањето низ Ормускиот Теснец мора да биде слободно
Европската Унија соопшти дека слободата на пловидба низ Ормускиот Теснец мора да се обезбеди „без никакво плаќање или надомест“, откако Иран посочи дека може да наплаќа за премин низ клучниот морски премин, пренесуваат новинските агенции.
Препорачано
„Меѓународното право предвидува слобода на пловидба, што значи… во суштина без никакво плаќање или надомест“, изјави портпаролот на Европската комисија, Ануар Ел Ануни, на прес-конференција во Брисел.
„Слободата на пловидба е јавно добро и мора да се обезбеди“, нагласи тој.
Претходно, италијанската премиерка Џорџа Мелони изјави дека враќањето на слободата на пловидба во Ормускиот Теснец е од клучен интерес за нејзината земја и Европската Унија и вети дека ќе соработува со партнерите за да ја постигне таа цел.
По нападите меѓу САД и Израел, Иран го ограничи сообраќајот низ теснецот за да изврши притисок врз своите противници, што предизвика зголемување на цените на енергијата бидејќи околу една петтина од светската нафта и гас минува низ тесниот морски пат, објави Ројтерс.
Како дел од своите предлози за завршување на војната, Техеран сака да воведе такси за бродовите што минуваат низ Ормускиот Теснец.
„Доколку Иран успее да добие овластување да наплаќа дополнителни тарифи за транзит низ теснецот, ова би можело да има економски последици и промени во трговските текови“, изјави Мелони пред Долниот дом на парламентот.
„Веќе работиме со коалицијата за Ормускиот Теснец, предводена од Обединетото Кралство и која обединува повеќе од 30 земји, за да создадеме безбедносни услови за целосно враќање на слободата на пловидба и снабдување“, додаде таа.
Сепак, вицепремиерот Матео Салвини во средата изјави дека Италија нема да испраќа бродови да патролираат во областа без мандат од ОН.
Мелони ги осуди сите прекршувања на двонеделниот договор за прекин на огнот договорен од САД и Иран претходно оваа недела. Таа, исто така, го повика Израел да ги прекине воените операции во Либан.
„Бевме на еден чекор од точката од која нема враќање, но сега имаме кревка перспектива за мир што мора да ја продолжиме со решителност“, рече Мелони.
