Доколку се точни информациите кои ги пренесува угледниот „Атлетик“, Ерлинг Халанд би можел да го напушти Манчестер сити во јули 2024 година за 200 милиони евра.

Толку е откупната клаузула за одличниот Норвежанец, пренесува изворот, со посебен услов – не може да ја активира клуб од Премиер лигата.

Тоа е добра вест, пред сè за Реал Мадрид, кој се обидуваше да го ангажира Халанд, но 22-годишниот голгетер го избра Пеп Гвардиола и неговиот проект.

Секако, се очекува и францускиот шампион ПСЖ со внимание да ја прими оваа информација. И покрај клаузулата, Халанд е тој што одлучува се додека е под договор со Сити, каде засега му оди повеќе од добро.

Отштета од 200 милиони евра не би била рекордна, бидејќи Нејмар пред пет години се пресели од Барса во ПСЖ за 222 милиони.