Актерот Ентони Хопкинс, со улогата на Ханибал Лектор, психијатар и канибалистички сериски убиец во хорор трилерот „Кога јагнињата ќе стивнат“, во режија на Џонатан Деми, замина во историјата како еден од најимпресивните негативци во светот на кинематографијата.

83-годишниот актер, исто така, доби Оскар за таа улога, а сега, во интервју за „Variety“, откри што всушност мислел за споменатиот филм пред тој дури и да започне да го снима.

„Во 1989 година бев во Лондон, работејќи на претставата „M.Butterfly“ кога агентот ми го испрати сценариото. Тој рече: „Зошто не го прочиташ ова? Се вика „Кога јагнињата ќе стивнат“ („The Silence of the Lambs“). Го прашав дали е детска приказна, барем така ми се чинеше од насловот… Се сеќавам дека беше жешко летно попладне, го примив сценариото и почнав да го читам. По десет страници, го повикав агентот. Тоа беше најдоброто нешто што некогаш сум го прочитал, приказната ме освои во почетокот“, се присетува легендарниот Хопкинс.

Тој додаде дека бил ужасно нервозен поради улогата на Ханибал Лектор.

„Замислете еден блед велшанец како мене да игра американски сериски убиец“, рече Хопкинс.