На полувремето од дербито меѓу Лацио и Наполи, македонскиот репрезентативец Елиф Елмас застана пред камерите на „ДАЗН“ и ги сподели своите впечатоци од првите 45 минути.

Елмас беше блиску до погодок во првиот дел, откако неговиот удар заврши во пречката и само неколку сантиметри го делеа од гол со кој Наполи ќе дојдеше до поубедливо водство.

„За мене не е најважно дали ќе постигнам гол, најважно е тимот да победи. Треба да продолжиме во ист ритам, бидејќи одигравме навистина добро прво полувреме. Резултатот од 2-0 секогаш може да биде незгоден“, изјави Елмас.

Тој зборуваше и за својата улога на теренот, истакнувајќи дека се труди да го даде максимумот без разлика на позицијата.

„Се обидувам да придонесам колку што можам, засега сè оди како што треба“, додаде македонскиот фудбалер.