Актерката Елен Пејџ по шест години откако соопшто дека е геј, сега соопшти дека е трансородово лице со ново име Елиот.

33-годишниот актер, кој е во брак со танчерката Ема Портер (26) од 2018 година, во вторникот наутро на својот профил на „Twitter“ отворено сподели емотивна изјава.

„Здраво пријатели, сакам да споделам со вас дека сум транс, заменките ми се тој/тие и јас се викам Елиот… Се чувствувам среќно што го напишав ова и што сум на ова место во мојот живот“, напиша актерот.

Елиот, кој доби Оскар за улогата во хит филмот „Juno“ од 2008 година, побара од своите следбеници и обожаватели да бидат трпеливи, признавајќи дека е „исплашен“ од „инвазивноста, омразата, шегите и насилството“, но дека тој ќе мора да се соочи со сè и да продолжи напред.

„Мојата работа е вистинскa, но исто така е и кревка… Вистина е дека, и покрај тоа што се чувствувам многу среќен во моментов и знам колку привилегија носам, јас исто така се плашам“, напиша тој.

Во својата изјава, Елиот не откри во која фаза од транзицијата се наоѓа, ниту сподели дали имал или планира хормонска терапија или операција за биолошка промена на полот.

Процесот на транзиција од женско во машко е различна за секоја личност, многумина го започнуваат процесот на хормонска терапија, пред да одлучат дали да направат операција за отстранување на градите, операција за конструирање на пенис и хистеректомија за отстранување на женските репродуктивни органи.

Елиот, кој во моментов треба да започне со снимање на третата сезона на серијата „The Umbrella Academy“ во февруари, го промени своето име и на своите профили на социјалните мрежи.  Актерот се заблагодари на своите најблиски за поддршката, изразувајќи „огромна благодарност“ што му помогнале да стигне до фаза каде што се чувствува пријатно да го следи своето јас.

По неговата објава се огласи и неговата сопруга Ема, искажувајќи јавна поддршка за својот сопруг, повторувајќи ја молбата на нејзиниот партнер за трпеливост.

„Јас сум многу горда на Елиот. Транс, квир и небинарните луѓе се подарок за овој свет… Исто така, барам трпеливост и приватност и дами се придружите во ревносната поддршка на транс животите секој ден. Постоењето на Елиот е дар сам по себе. Блескај мил Е. Те љубам“, напиша Eма.

Одлуката на Елиот јавно да открие дека е трансродово лице доаѓа скоро три години откако парот се венча со тајна церемонија по само шест месеци поминати заедно.