Апликациите базирани на генеративна вештачка интелигенција бележат раст во популарноста, преземањата и приходите, покажува најновото истражување на аналитичката компанија Sensor Tower, објавено од TechCrunch.

Во првата половина од 2025 година, овие апликации се преземени дури 1,7 милијарди пати, генерирајќи 1,87 милијарди долари – двојно повеќе од втората половина на 2024 година. Корисниците поминале вкупно 15,6 милијарди часа на вакви апликации, низ 426 милијарди сесии, што претставува значителен скок во однос на 8,5 милијарди часа поминати во претходниот период.

Најбрзо растечки пазар е Азија, со 42,6% од сите глобални преземања, предводена од Индија и континентална Кина.

На глобално ниво, ЧетГПТ е водечка апликација по приходи, со исклучок на Кина, каде доминира ДипСик. Просечниот корисник го користи ЧетГПТ по 16 минути дневно, најчесто за совети поврзани со исхрана, лични финансии и пазарување.

Истражувањето заклучува дека генеративните ВИ апликации стануваат дел од секојдневната рутина на милиони корисници и нивен постојан дигитален асистент.